Luk 2 | WRS | STEP | Mariava Yesusmba lengvnamba, honamba moamba os phona. Akustusva himba duang mendekli luhunvna Romnindna, doa himba moa ishonga vinna os, kava novol velm vev nihilm indakonda pethanindnam, no provinsnindnam, no provinsnindnam, indkumbinam. Memba seilnovra nomba duangva indhanana nihilva novol vewol vinna tombairava. Nonam vena, Kuirinius himba kuwul eusil wulluhunvnam Siria provinsnindna.

Luke 2

Maria Otolm Lengna, Yesusm Awo.

Matiu 1:18-25

1 Mariava Yesusmba lengvnamba, honamba moamba os phona. Akustusva himba duang mendekli luhunvna Romnindna, doa himba moa ishonga vinna os, kava novol velm vev nihilm indakonda pethanindnam, no provinsnindnam, no provinsnindnam, indkumbinam. Memba seilnovra nomba duangva indhanana nihilva novol vewol vinna tombairava. Nonam vena, Kuirinius himba kuwul eusil wulluhunvnam Siria provinsnindna.

3 Wo nonamba duangva osva onbavna, wo noinda deuvnindva himba wohgapiangu vevna hevna kembellamba, osm henamba nihilva lopo vinvra tombairava di hevindava.

4 Wo Yoseppa Mariatalaiva, himba hem waiavna di Nasaret kembella, mera Galili provinsra. Himba Devittindirini, wo noinda himba galm vevna hevna kembellam Betlehemram, no kembellam nemet ten Devit simbehumunillini anam. Nomba Betlehemba di lohvna Yutia provinsra. Yoseppa venamba Nasaretriniva, wo doa os gana Betlehemramba, Mariamba os waingana, ena avna. Hev omnana, Betlehemra duangva pina nihilva novol vewol vinvav si tombairava.

6 Yosep os waingana Mariamba Betlehemram, doa di Mariamba kelathamnavna, otolmba lengalmba. Hev os lengna hevna mimirinim tuendisrinimba, wo malona hemba ningilahana. Doa hev os otolmba nomtholahana boksmera, di ten sapi inne hlalvohvnam. Wo heva os mani vuhe besallama, ambo sahoklalla, manara, owai, vuhemba lohvnamoa deuvrava, ninmba shalmba, doa doara pilivhoangu vena deuvpa.

Sesoana Ovsongolnindrini Moa Ishunvna Sipsipna Kekalvhonindm, Kristusva Doa Proi.

8 Mariava Yesusmba lengvnamba, wo andranindva di kekalvho vewol vewuvna hevna sipsipmba di kembelnumbra maim. Himba di ambara lulungu vevna sinimba, ten sipsip lulungu vevnam ilsra. Doa mongo Sesoana ovsongolnindriniva holopinnamba andranindm nom, wo dingas Sesoana pusambanakambava weisming vewol vena, di he kekalvho vrivnam, wo andranindva pemba os vivna i.

10 Doa heva os ovsongolnindriniva unna hemba, pepehtovpa wuleihu, kava moa besal wulprunv yemba. Indkumbiva si hillivrava, doa indk vethapravra. Honi sinimba di Betlehem kembellava mongova ungevliriniva doa lengei tuendisrinim. Wo eva mani ombandhanarinima, owai, himba si os lohvav Kristus mendeklielm. He si yemba lopslahawol vevav monakoklariniva.

12 Memba yem kava ishunv, ango dom nonglalm hem, ata yimba os nunglivav, otolva malona ningilvra. Himba ata vuhe besallava lingilvramoa, owai, ata himba lingilvra, di ten sapim dahwol velvohvm, wo ata yimba nunglivav hemba, eva uvav, tanam hona moamba ovsongolnindrininamba.

13 Wo nungi lelnam ovsongolnindva esvema senamini pihapianamba, di mongawulm kusovna noi owallini ovsongomongo. Doa hev indkumbi sangal sevrivna, Sesoana nihilm okulivna. Hev uvna, pioa Sesoamoa okolalvohvra, nihilm wivimnivra, manara, ten senanonoa hev avm. Wo Sesoava si nesmos vewol vevra indhanamba hona petharava, nomba indhanamba temba hevpa beswonamba doa nongalvpa. Wo si indwonam aevulvav himba.

Sipsipna Kekalvhonind Yesusmba Nunglina.

15 Doa ovsongolnindva osangas vinamba, wo os wohangana Sesoaindam ovram henga, hev sipsipna kekalvhonindmba nomba sandhalaha angana os. Doa sipsipna kekalvhonindva nomba hevm ishuwul vevna, piv ambo indkumbi angavai dom Betlehemram, nungli honam nengam, mani hevpa dihi phoi? Sesoa mendekliva pimba doa ishuni, angavai bavo. Wo noinda himba lelnam anganamba, Yosepim Mariaim di nongalpulvo, otolva boksmera ningilvna, di ten sapi noinda inne hlalvohvnam.

17 Doa hev otolmba nunglutithueivnamba, hev ishunvna Mariaim Yosepim, eva monglam indhanam, nom ten ovsongolnind noi moa Sesoana doara hem ten ishunnam, otolmom. Wo no indkumbiva diva no moamba os hillinvna sipsipna kekalvhonindnamba, wo himba indk vethapravna, besal, wo himba mindnam nengavnang wohvivna.

19 Wo Mariava hevpa himba maivethanamoa, memba daipotava ishunvpa, owai, himba yunalm nengaomana vevna, wo lehvna, plalmom levrapialm vevna hevm, nom hev ten vena, nonglanam, eva hellenam.

20 Doa sipsipna kekalvhonindva ishupieinnamba, os henga sandhambuona, hevna sipsipm kekalvho vrelm. Hev indkumbi momnanam Sesoam sangal sevrimnivnamba, nihilm wulovolmanavnam, honamba pivva doa vi, nungli eva hilli, memba hevm besalangas. Doa memba Sesoana ovsongolnindriniva pimba ishuniva, honamba tanam men osm.

Araravalva Yesusm Ombolm Tempellam Waiengana, Osm Sesoam Indthoamnalm, Yetindirini.

21 Wo Yesusva simba 8pelara venamba, doa nihtovpa kovhueimnivna, osm ora Sesoatindi. Araravalva os awohona Yesus, os ten seilm ovsongolnindrini Mariam ishomnanam.

22 Doa dawonam araravalva ohona, pioa engavai Yerusalemram tempellam. Moses moashulnindrini seilva doara os novol vewol vena, araravalva osangas evevra, osm beswonam elohvra Sesoana novrava. Doa himba enganamba, ombolm waiengana, ohona, pioa hemoa os Sesoa mendeklimoa ihindthoamnavav di tempella. 23 Noinda osva ohona, mendeklina tombaimomba doara novol velohv os, avalva yiveltowondmba lengvrava, doa araravalva otolmba waiengavra, mendeklim ihindthoamnalm, osm ora yetindirini.

24 Doa araravalva hevna ombolmba os waiephona tempella di, ohona, pivva ata tatapetava holvo evrahunvra andranindm, wo he ata suwera wohweihimnivav, Sesoam sembayang venalm. Doaramini tombaimomba os novol velohv, araravalva os evevra, leumb samblamba holvorombtrahunvra, wo owaingava, himba ambo hinumb otolsamblam holvorombtrahunvra.

Tendorini Simeon Yesusm Englana Wailohvna, Sesoam Okolavna.

25 Doa Yesusna araravalva tempella ahavna, mongo mundil tendorini di avna, nihilva Simeon, himba Yerusalemra wohavna. Himba besal indhanarini, wo Sesoana moam engvna doara. Himba undva os vrevna doara, tanamolnam Sesoava si pimba Israelnindmba sandhavra, osm beswonam ara. Doa doara Sesoasongolva sihamnana, nengavnangm sishona vremnana.

26 Sesoasongolva doara ishomnana os, yemba nisva dahavavmoa owai, boasna yimba pevna novnamba nonglavav indhanarinim Kristusm, temba Sesoa mendekliva hemba pusvundthoanamba, osm yem Israelnindm lopshalm monakoklariniva. Hemangas yimba doara amnavna.

27 Wo Sesoasongolva henamba tuhmanana nengavnangmba, doa himba tempellam pronamba, nonamba araravalva Yesusmba waiepravnamba, nom osm velm, ten lohohmora luhunvm, vinilm otolm. 28 Doa diva Simeonmba Yesusmba avalnamini holvoranamba, os Sesoam okolavna.

29 Hev ona, mendekli, yena moamba tanamolnam, temba yimba doarava kamba ishomnanamba. Doa kava men nonglav indhanarinimba, temba yimba kamba doara ishomnanamba, si provav. Himba kamba Israelnindmba si lopshawol vevav monakoklariniva. Doa manapenam, kamba dahavra indwonam, manara, kava doa hemba kavna novnamba nonglai.
31 Yimba doa desvhoai hemba, osm indhanamba indkumbiva si hemba nunglivav, no pethanind no pethanind. Doa osva himba si upsil lovhueinvav puehalnindmba, nomba temba Yutanindna meisungundva angavpa, wo himba eva si os yena moamba kek vithivavta. Wo kamoa Israelnindmoa indhanamba si kamba okolowol vivav, yimba Sesoatindi.

33 Simeonmba os Sesoam okolavna, doa Yesusna araravalva tit evevna, ohona, pai esalm hevpa himba pina ombolmba osva ishomnav? 34 Doa henga Simeonmba Yoseptatanamba awothowol vena, aralm, avalm, ombolm, ona, Sesoaoa yemoa kolvrowol vera. Doa hev henga avalmangas ishomnana os, yena ombpovmba Sesoava doa pusvundthoana, mendeklim andram velm. Henanapopol Israelnindva mindnam si Sesoamba lovahthamnavav undnahonamba. Doa heva os monglamba Israelnindmba hemba wohplel vevav os. Himba Yesusmba si nunglivav, uvra, keknam, doa heva os himba hemba okus vivra.

35 Indhanamba mindnam si yena ombpovmba nunglivav, wo os hevna nengavnangva si amballa phunvav, vei besal indhanana, eva sahoklal indhanana. Doa heva pevm si os kinsombva venavav, oi bunena lui.

Ongakolariniva Anava Yesusm Moa Ishomnavna.

36 Simeonmba osva ishomnanamba Mariamba, doa ongakolarini phunna, nihilva Ana. Himba Asertindirini avna, wo Panuelna mol avna. Doara himba tatlana avna, tahonmba 7pelara vena. Doa tlalmba os dahana, wo hev peli avna, tahonmba mindnam vena. Osomba henamba esvema, 84pelara lohmanavna. Doa elsus hev tempellamba tonglalohvna, hev innemba diva lohovna, sembayang os vevna sinim eva okombanam. Doa hev Sesoana moashulnindrini avna os.

38 Doa Anava phonamba, wo hev Yoseptatanam di wonlohvna, wo hev ona, Sesoava lehra vei, Kristusva doa phoi. Doa hev Yesusmom ishunvna hevna mongawa sembayangnindmba, nomba temba doara undva ilvahvnamba osva, Sesoava si pimba Yerusalemnindmba buiriniva wolapho vevav, osm indhana besal aevulla.

39 Anava os ishopianamba, doa araravalva sembayang wevsava wohevepianamba di tempella, nomba temba doara novol velohv mendeklina moara. Doa Yoseptatana nominiva vinamba, henga hevna kembellam angana Nasaret kembellam Galili provinsram. 40 Ombolmba mendekli vena, doa undva henamba beswonam lohvna, wo hev wiyera lohvna manam manam manam. Doa Sesoava hemba beswonam nonglavna, lehra.

Yesusva Tempella Avna, Ona Kana Arana Deuvpa.

41 Doa dawonam araravalva Yesusmba Yerusalemram waiengana tihram, os ningthiv Pasovatih. Yesusna osomba os lohmanavna 12pelara, nonamba waienganamba. Araravalna wevsava os prunvna, himba Yerusalemramba etonglalohvna Pasovatihramba henga no tahonnam no tahonnam.

43 Wo tihva vipieinamba, wo innemba hlapianamba, doa tihnindva angawul vena hevna kembellam. Araravalva monam engavna, os hevna ombolm enengmanavna, dihi hesna gav, dihi monglam indhanam wongav? Doa heva os owai, ombolva mendah pronamoa, owai di himba wohana.

44 Araravalva os titnam engavna, simba mongasal evena, doa hev hevna ombolm eslelvna owalhovra, di ten bukithavnam, heva os owai, enonglanamoa. Doa hev henga Yerusalemram engana, eslelalm dom. Ephonamba, diva henga eslelvna hemba, simba mongasal evevna, no kotava mendekli lohv. Doa mongnasiva hev henga hevna ombolmba enonglana tempellava. Himba katekisnindmongo aevulvna, hena Sesoamomba hillinvna, doa hev hemba osihinvna, plalmba velokusa vevna.

47 Tempelnindva di Yesusm hillimnivna, doa indkumbiva una, pai himba und besalna lohv. Himba moamba besal esesmba ishowol vinv, lehra lohv. Araravalva eva ehellemnavna henamba moamba, doa tit evevna, doa avalva hemba omnana, omb, es hevpa yimba kamba hona kinwondava plothunv, araiva kava yemba duusnahonam eslelvna?

49 Yesus unna, pev doara enengta, dihi tempellava av, es hevpa yimba kamba indanamba eslelvna? Manara, memba deuvpa kana arana lohv, kava hui wohlohvra dawonam. Araravalva ehellenamba no moamba, wo heva os tit evena plalmba.

51 Doa araravalva nominiva evenamba, hevna ombolmba waiengana henga Nasaret kembellam. Avalva maivethanamoa hona moamba owai. Doa Yesusva araravalna moamba hillinvna, aongpa vevnamoa, doa hemba mendekli venamba, undva besalangas wulluhvna. Sesoava hemba beswonamba nonglavna, wo eva owalva hemba beswonam nunglivna, besal.